اهلا بيكم يا حبايبي انا لقيت ناس كتير كل شوية بتقول احنا زهقنا من الاجازة زهقنا خلاص وعاوزين الدراسة ..عارف عاوزين الدراسة ليه عشان يقولوا زهقنا من الدراسة برضه كنوع من التجديد بقي وكده =D
عاجبني قوي الشخص اللي بقي كل يومه مجرد يدوس هوم في الفيس بوك محسسني انه مستني عفريت يطلع او حاجة وينام وبس وبعدين يقلك زهقان طب ليه ما الشقة في جيبك ههه اقصد ما انت ممكن تعمل حاجات كتير في ويومك بدل ما تضيعه كده وخلاص
ففكرت اني اعمل نوته زي دي واقول شوية افكار اللي جم علي بالي يعني ممكن تستغلوا بيها وقتكوا وانا مش قاصد الحصر علي الكلام ده لا انا بس جمعت اللي قدرت عليه وممكن كل واحد فينا عنده حاجة تاني غير دى يستغل فيها وقته
وعشان مش هقدر اجمع لينكات كتير ومش هقدر اوفي كل حاجة فانا هقول الافكار وبعدين انزل اللينكات اللي معايا حاليا وبإذن الله النوتة دى هتجدد دوريا كل ما اشوف حاجة جديدة مفيدة ولو حد فيكوا عندوا حاجة جديدة يضيفها في كومنت عشان يساعد غيره وبعتذر ان اكيد اللينكات اللي هانزلها هتكون من اهتماماتي معظمها عشان كده بطلب منكوا تضيفوا اللي بتحبوه انتوا كمان
اتفضلوا وسموا الله
ممكن تحفظ قران لو كنت مش حافظ او تراجع لو كنت حافظ
ممكن تهتم اكتر بدينك وتدرس فقة او حديث او اي مجال شايف انك هتنجز فيه واهو انت بتستفاد وبتنمي روحك
ممكن تقرأ كتب ورقية او روايات وكده عشان بتكون افضل كورقية
ممكن تخرج مع اصحابك اكتر وتزور اهلك او حد مشفتوش من زمان
ممكن تشارك في دوري في اي رياضة بتحبهالو ليك هواية معينة او حاجة حاول تنميها خالص الفترة دى سواء شعر او عزف او رسم او اي حاجة
ممكن تنمي نفسك في لغة بتحبها سواء بتدريب ذاتي عن طريق كتب او سماع افلام باللغة دي مترجمة ثم غير مترجمة او عن طريق مواقع وهنزلها تحت
لو بتحب مجال معين مثلا فيزياء بيولوجي هندسه او حتي سياسة ممكن تاخد كورس فيهم او تزود علمك فيهم عشان متبقاش مجرد هاوي وخلاص وهنزل لينكات لشوية مواقع بتدي كورسات كويسة جدا جدا في كل المجالات ومجانا الا لو عاوز شهادة موثقة من الجامعات اللي منزلة الكورسات دي
ممكن تتفرج علي وثائقيات او فيديوهات تفيدك جدا في حياتك وفي مجالك لو مش بتحب جو القراية وكده واهو اديك بتاخد المعلومة بالطريقة اللي بتحبها
ممكن تتفرج علي افلام فيها فكرة وعالمية وواخده جوائز كتير عشان تنمي عقلك من كل النواحي
ممكن تتفرج علي برامج هادفة من اللي بتخاطب عقلك وتنميه ممكن تجرب حاجات جديدة في حياتك معملتهاش قبل كده خالص زى مجال جديد عمرك ما سمعت عنه
ممكن علي فكرة تذاكر منهج السنة الجايه لو بالنسبالك المذاكرة حاجة حلوة اه من غير تريقة في ناس بتحب الموضوع
ممكن بقي تشارك في اي اعمال خيرية تساعد بيها غيرك او تبدع انت وتعمل حاجة خير لغيرك هتشوف جزائها قدامك وكمان ليها ثواب عند ربنا
ممكن تمارس دورك التنويري بأنك تقدم خبرتك او ميزة عندك للناس
"Share" لو عجبك المحتوى . اضغط على المشاركه
مشاركة